کوئٹہ بلوچستان کا چہرہ ہے، ترقی پر سمجھوتہ نہیں ہوگا، وزیراعلیٰ بلوچستان

کوئٹہ: صوبائی دارالحکومت کوئٹہ کی تاریخی شناخت اور ماضی کی خوبصورتی بحال کرنے کے لیے جامع حکمت عملی پر عملدرآمد کا فیصلہ کیا گیا ہے۔

وزیراعلیٰ بلوچستان میر سرفراز بگٹی کی زیرصدارت اجلاس میں کوئٹہ ڈویلپمنٹ پیکج کے تحت جاری ترقیاتی منصوبوں اور شہر کی خوبصورتی سے متعلق اقدامات کا جائزہ لیا گیا۔

اجلاس کو بریفنگ میں بتایا گیا کہ کوئٹہ ڈویلپمنٹ پیکج کے تحت 12 منصوبے مکمل ہوچکے ہیں، جبکہ 7 منصوبوں پر کام جاری ہے۔ اس کے علاوہ 5 نئے منصوبے بھی تجویز کیے گئے ہیں۔

وزیراعلیٰ سرفراز بگٹی نے جاری منصوبوں پر کام مزید تیز کرنے اور نئے منصوبوں پر بلا تاخیر کام شروع کرنے کی ہدایت کی۔ انہوں نے کہا کہ ترقیاتی منصوبوں میں معیار اور رفتار دونوں کو یقینی بنایا جائے اور غیر ضروری تاخیر برداشت نہیں کی جائے گی۔

انہوں نے کہا کہ کوئٹہ بلوچستان کا چہرہ ہے، اس لیے شہر کی ترقی، خوبصورتی اور بنیادی سہولیات کی بہتری پر کوئی سمجھوتہ نہیں ہوگا۔ کوئٹہ کو جدید، خوبصورت اور بہتر شہری سہولیات سے آراستہ کرنے کے لیے تمام دستیاب وسائل بروئے کار لائے جائیں گے۔

وزیراعلیٰ نے کہا کہ کوئٹہ کی تاریخی شناخت اور ماضی کی خوبصورتی بحال کرنا حکومت کی ترجیحات میں شامل ہے، اس لیے شہر کی تزئین و آرائش کے منصوبوں کو نتیجہ خیز بنایا جائے۔

انہوں نے سڑکوں، انفراسٹرکچر اور شہری سہولیات کی بہتری کے ساتھ ساتھ شہر کی خوبصورتی پر بھی خصوصی توجہ دینے کی ہدایت کی۔ ان کا کہنا تھا کہ کوئٹہ کی ترقی صرف تعمیراتی منصوبوں تک محدود نہیں بلکہ اسے ایک منظم، جدید اور خوبصورت صوبائی دارالحکومت بنانا حکومت کا مقصد ہے۔