گنداواہ میں کوٹڑہ پولیس اسٹیشن پر حملہ ناکام

گنداواہ: کوٹڑہ پولیس اسٹیشن پر مسلح افراد کا حملہ پولیس، اے ٹی ایف اور ایف سی کی بروقت کارروائی کے باعث ناکام بنا دیا گیا، تاہم فرار ہوتے ہوئے حملہ آوروں نے ایک خالی ریسٹ ہاؤس کو دھماکے سے تباہ کردیا۔

ذرائع کے مطابق صبح تقریباً 9 بج کر 45 منٹ پر مسلح افراد 8 سے زائد موٹر سائیکلوں پر سوار ہوکر کوٹڑہ پولیس اسٹیشن پہنچے اور خودکار و بھاری ہتھیاروں سے فائرنگ شروع کردی۔

حملے کی اطلاع ملتے ہی جھل مگسی پولیس، اے ٹی ایف اور ایف سی 151 ونگ کے اہلکاروں نے جوابی کارروائی کی، جس پر مسلح افراد پسپا ہوکر پولیس اسٹیشن کے پچھلے حصے کی جانب فرار ہوگئے۔

فرار کے دوران حملہ آوروں نے ایک خالی ریسٹ ہاؤس کو دھماکا خیز مواد سے نشانہ بنایا۔ ذرائع کے مطابق مذکورہ عمارت تقریباً 8 ماہ قبل ایف سی اہلکاروں کے استعمال میں تھی، تاہم اس وقت غیر آباد تھی۔

واقعے کے بعد پولیس، اے ٹی ایف اور ایف سی کی جانب سے علاقے میں سرچ اور اسکیننگ کا عمل جاری ہے، جبکہ واقعے میں ہونے والے نقصان اور دیگر تفصیلات کا بھی جائزہ لیا جارہا ہے۔