پشتون قومی جرگہ کا پلیٹ فارم سیاسی مقاصد کے لیے استعمال کرنا قابل افسوس ہے، مسلم لیگ ن ضلع قلعہ سیف اللہ

​قلعہ سیف اللہ (کلیم اللہ خان کاکڑ): مسلم لیگ ن ضلع قلعہ سیف اللہ کے سینئر کارکنوں نے گزشتہ روز کوئٹہ میں منعقدہ پشتون قومی جرگہ کے پلیٹ فارم سے کی گئی تقاریر پر گہری تشویش کا اظہار کرتے ہوئے کہا ہے کہ پشتونخوا ملی عوامی پارٹی کے چیئرمین محمود خان اچکزئی نے جرگے کے پلیٹ فارم سے رکن قومی اسمبلی و صوبائی جنرل سیکرٹری جمال شاہ کاکڑ کے متعلق جو بے بنیاد گفتگو کی، وہ قابل افسوس اور سیاسی اقدار کے منافی ہے۔
​ایک جاری بیان میں واضح کیا گیا کہ جمال شاہ کاکڑ مسلم لیگ ن بلوچستان کا قیمتی سرمایہ اور عوام کے منتخب نمائندے ہیں، جنہوں نے ہمیشہ علاقے کی ترقی، امن اور عوامی فلاح کے لیے بے لوث خدمات انجام دی ہیں۔
​سینئر کارکنوں کا کہنا تھا کہ جرگہ پشتون قوم کی روایات کی علامت ہے، اور اسے سیاسی مقاصد کے لیے استعمال کرنا نہ صرف غیر جمہوری ہے بلکہ پشتون کلچر کی بھی توہین ہے۔ انہوں نے افسوس کا اظہار کیا کہ آنے والے انتخابات کے پیش نظر جرگے کو سیاسی مقاصد کے لیے استعمال کیا جا رہا ہے۔
​مسلم لیگ ن ضلع قلعہ سیف اللہ کے کارکنوں نے محمود خان اچکزئی سے پرزور مطالبہ کیا ہے کہ وہ اپنے بیان پر نظرثانی کریں اور سیاسی اختلاف کو تہذیب کے دائرے میں رکھیں۔ بیان کے آخر میں عزم ظاہر کیا گیا کہ پارٹی کارکن جمال شاہ کاکڑ کے ساتھ مکمل متحد ہیں، اپنی قیادت کے خلاف تقاریر پر کوئی سمجھوتہ نہیں کریں گے اور ہر قدم پر شانہ بشانہ کھڑے رہیں گے، کیونکہ مسلم لیگ ن ہمیشہ جمہوریت، رواداری اور اخلاقی سیاست کی علمبردار رہی ہے۔