قلات میں سیکیورٹی فورسز کا آپریشن، 12 دہشت گرد ہلاک

قلات: سیکیورٹی فورسز نے بلوچستان کے ضلع قلات میں انٹیلی جنس بیسڈ آپریشن کرتے ہوئے 12 دہشت گردوں کو ہلاک کردیا۔

آئی ایس پی آر کے مطابق قلات میں دہشت گردوں کی موجودگی کی اطلاع پر سیکیورٹی فورسز نے کارروائی کی۔ آپریشن کے دوران دہشت گردوں کے ٹھکانے کو مؤثر کارروائی کے ذریعے تباہ کردیا گیا۔

ترجمان کے مطابق کارروائی میں بھارت کے حمایت یافتہ ’’فتنہ الہندوستان‘‘ سے وابستہ 12 دہشت گرد ہلاک ہوئے، جبکہ دہشت گردوں کے قبضے میں موجود اسلحے کا ذخیرہ اور دیسی ساختہ دھماکہ خیز آلات بھی تباہ کردیئے گئے۔

آئی ایس پی آر کے مطابق علاقے میں موجود دیگر ممکنہ دہشت گردوں کے خاتمے کے لیے کلیئرنس آپریشن جاری ہے۔ سیکیورٹی فورسز اور قانون نافذ کرنے والے ادارے ’’عزمِ استحکام‘‘ کے تحت ملک سے دہشت گردی کے خاتمے کے لیے کارروائیاں جاری رکھے ہوئے ہیں۔