کوئٹہ‘ قصاب خانوں کے سامنے جانور ذبح کرنے سے شہریوں کو مشکلات، تعفن اور بیماریوں کا خدشہ

صوبائی دار الحکومت کوئٹہ کے مختلف شاہراہوں اور گنجان آباد علاقوں میں قصابوں کی جانب سے دکانوں کے سامنے بیل باندھ کرکے ذبح کرنے کا سلسلہ جاری ہے، جس کے باعث شہریوں کو شدید مشکلات کا سامنا ہے۔ جانوروں کا خون، آلائشیں اور گندا پانی سڑکوں پر بہنے سے نہ صرف ٹریفک اور پیدل آمدورفت متاثر ہو رہی ہے بلکہ تعفن اور مختلف بیماریوں کے پھیلنے کا خدشہ بھی پیدا ہوگیا ہے‘عوامی حلقوں نے کہا ہے کہ کوئٹہ شہر کے مختلف شاہراﺅں علمدار روڈ، جوائنٹ روڈ، ڈبل روڈ، عالمو چوک، کانسی روڈ سمیت شہر کے دیگر علاقوں میں بعض قصاب اپنی دکانوں کے سامنے جانور باندھ کر انہیں وہیں ذبح کرتے ہیں۔ ذبح کے بعد خون اور دیگر فضلات سڑکوں اور فٹ پاتھوں پر پھیل جاتے ہیں، جبکہ صفائی کا مناسب انتظام نہ ہونے کے باعث کئی مقامات پر گندگی جمع رہتی ہے۔ شہری حلقوں کا کہنا ہے کہ مصروف شاہراہوں پر جانور ذبح کرنے سے ٹریفک کی روانی بھی متاثر ہوتی ہے اور پیدل چلنے والوں خصوصاً خواتین، بچوں اور بزرگوں کو شدید مشکلات کا سامنا کرنا پڑتا ہے۔ خون اور آلائشوں کے سڑکوں پر بہنے سے بدبو اور تعفن پیدا ہونے کے ساتھ مکھیاں اور دیگر جراثیم بھی بڑھنے کا خدشہ ہے، جو شہریوں کی صحت کے لیے نقصان دہ ثابت ہوسکتے ہیں عوامی حلقوں نےکوئٹہ میٹروپولیٹن کارپوریشن، ضلعی انتظامیہ اور متعلقہ حکام سے مطالبہ کیا ہے کہ شہر کی مین شاہراہوں اور آبادی والے علاقوں میں دکانوں کے سامنے جانور ذبح کرنے کا نوٹس لیا جائے، قصابوں کو مقررہ مذبح خانوں میں ذبح کرنے کا پابند بنایا جائے اور خلاف ورزی کرنے والوں کے خلاف کارروائی کی جائے شہریوں نے مزید مطالبہ کیا ہے کہ شہر میں صفائی کے نظام کو مو¿ثر بنایا جائے اور سڑکوں پر خون و آلائشیں پھینکنے یا بہانے کی روک تھام کے لیے خصوصی ٹیمیں تشکیل دی جائیں تاکہ کوئٹہ شہر کو گندگی، تعفن اور ممکنہ وبائی امراض سے محفوظ رکھا جاسکے۔