بکرا منڈی میں شہریوں اور بیوپاریوں کو سہولیات کی فراہمی اولین ترجیح ہے، میر مرتضیٰ خان جمالی

گنداخہ:(نامہ نگار فرید احمد) چیئرمین مارکیٹ کمیٹی اوستا محمد میر مرتضیٰ خان جمالی نے بکرا منڈی کا دورہ کرکے وہاں جاری انتظامات، صفائی ستھرائی اور شہریوں کو فراہم کی جانے والی سہولیات کا تفصیلی جائزہ لیا۔ اس موقع پر انہوں نے بکرا منڈی میں جانوروں کی خرید و فروخت کے انتظامات، صفائی کی صورتحال، سکیورٹی اور دیگر بنیادی سہولیات کا معائنہ کیا،میر مرتضیٰ خان جمالی نے متعلقہ افسران اور عملے کو ہدایت کی کہ بکرا منڈی میں آنے والے شہریوں، خریداروں اور بیوپاریوں کو ہر ممکن سہولت فراہم کی جائے اور انہیں کسی قسم کی مشکلات کا سامنا نہ کرنا پڑے۔ انہوں نے صفائی ستھرائی کے نظام کو مزید مؤثر بنانے، منڈی میں نظم و ضبط برقرار رکھنے اور عوامی سہولیات کی فراہمی یقینی بنانے پر بھی زور دیا،چیئرمین مارکیٹ کمیٹی میر مرتضیٰ خان جمالی نے کہا کہ عوامی سہولیات، صاف ستھرا ماحول، شفاف کاروباری سرگرمیوں اور بہتر انتظامات کی فراہمی مارکیٹ کمیٹی کی اولین ترجیحات میں شامل ہے۔ بکرا منڈی میں آنے والے شہریوں اور بیوپاریوں کے لیے سازگار ماحول فراہم کرنے کے لیے تمام دستیاب وسائل بروئے کار لائے جا رہے ہیں۔ انہوں نے کہا کہ جانوروں کی خرید و فروخت کے دوران شہریوں کو سہولت اور بیوپاریوں کو مناسب ماحول فراہم کرنا انتظامیہ کی ذمہ داری ہے، جس میں کسی قسم کی غفلت برداشت نہیں کی جائے گی،انہوں نے متعلقہ عملے کو ہدایت کی کہ منڈی میں صفائی، پینے کے پانی، سکیورٹی، ٹریفک کی روانی اور دیگر بنیادی ضروریات پر خصوصی توجہ دی جائے تاکہ شہری اطمینان بخش ماحول میں خریداری کرسکیں،دورے کے دوران متعلقہ افسران اور عملے نے چیئرمین مارکیٹ کمیٹی کو بکرا منڈی میں جاری انتظامات، جانوروں کی آمد و رفت، خرید و فروخت اور شہریوں کو فراہم کی جانے والی سہولیات کے حوالے سے تفصیلی بریفنگ بھی دی۔ میر مرتضیٰ خان جمالی نے انتظامات پر اطمینان کا اظہار کرتے ہوئے انہیں مزید بہتر بنانے کی ہدایات جاری کیں