چینی تعاون کے بغیر امریکا کیلئے ایران کو معاشی طور پر تنہا کرنا ممکن نہیں، نیویارک ٹائمز کا دعویٰ

امریکی اخبار نیویارک ٹائمز نے اپنے تجزیے میں کہا ہے کہ چین کے تعاون کے بغیر امریکا کے لیے ایران کو مکمل طور پر معاشی طور پر تنہا کرنا آسان نہیں ہوگا۔

رپورٹ کے مطابق چین ایران کا سب سے بڑا تجارتی شراکت دار اور ایرانی تیل کا اہم خریدار ہے، جس کی وجہ سے واشنگٹن کی جانب سے عائد کی جانے والی پابندیوں کے اثرات محدود ہوسکتے ہیں۔ چین کی چھوٹی نجی ریفائنریاں ایران سے تیل خریدتی ہیں، جو امریکی پابندیوں سے نسبتاً کم متاثر ہوتی ہیں۔

تجزیے میں بتایا گیا ہے کہ اگر چین ایران کے ساتھ تجارتی روابط برقرار رکھتا ہے تو تہران کے پاس آمدنی کا ایک اہم ذریعہ موجود رہے گا، جس سے امریکی دباؤ کی حکمت عملی کو مشکلات کا سامنا ہوسکتا ہے۔

رپورٹ کے مطابق چین کے پاس بھی امریکا پر معاشی دباؤ ڈالنے کے ذرائع موجود ہیں، جن میں اہم معدنیات کی برآمد محدود کرنا شامل ہے، جس سے امریکی ٹیکنالوجی اور دفاعی صنعت متاثر ہوسکتی ہے۔

نیویارک ٹائمز کے مطابق ایران پر مزید پابندیاں عائد کرنے کے باوجود چین کے تعاون کے بغیر تہران کو مکمل معاشی تنہائی کا شکار کرنا مشکل ہوگا۔ واشنگٹن کی حکمت عملی کا انحصار بڑی حد تک اس بات پر ہے کہ بیجنگ امریکا کے ساتھ تعاون کرتا ہے یا ایران کے ساتھ اپنے تجارتی تعلقات جاری رکھتا ہے۔