فیلڈ مارشل عاصم منیر سے بلوچستان کی سیاسی قیادت اور اہم شخصیات کی ملاقات

فیلڈ مارشل عاصم منیر سے بلوچستان کی سیاسی قیادت اور اہم شخصیات کی ملاقات

فیلڈ مارشل سید عاصم منیر، این آئی (ایم)، ایچ جے، چیف آف آرمی اسٹاف و چیف آف ڈیفنس فورسز (COAS & CDF) نے بلوچستان کی ممتاز شخصیات اور سیاسی قیادت سے ملاقات کی۔ملاقات کے دوران چیف آف آرمی اسٹاف و چیف آف ڈیفنس فورسز نے اس امر پر زور دیا کہ بلوچستان اور پاکستان کا حال اور مستقبل ایک ہے اور ہمیشہ ایک ہی رہے گا۔ انہوں نے کہا کہ بلوچستان باصلاحیت، ثابت قدم، محبِ وطن اور باوقار عوام کی سرزمین ہے۔ انہوں نے اس بات پر زور دیا کہ واضح قومی بیانیہ اور دیرپا امن و استحکام صوبے کی حقیقی معاشی صلاحیت کو بروئے کار لانے، سرمایہ کاری کو راغب کرنے اور بلوچستان کے وسیع انسانی و قدرتی وسائل کو عوام کی عملی خوشحالی میں تبدیل کرنے کے لیے بنیادی اہمیت رکھتے ہیں۔ فیلڈ مارشل نے کہا کہ بلوچستان کے نوجوانوں میں صلاحیت یا مواقع کی کوئی کمی نہیں،

اور وہ ہمارے معاشرے کا سب سے متحرک اور امید افزا طبقہ ہیں۔ انہوں نے زور دیا کہ نوجوانوں کو بااختیار بنانا اور انہیں قومی ترقی میں اپنا کردار ادا کرنے کے مواقع فراہم کرنا پائیدار ترقی کے لیے بنیادی حیثیت رکھتا ہے۔چیف آف آرمی اسٹاف و چیف آف ڈیفنس فورسز نے کہا کہ فتنۃ الخوارج اور فتنۃ الہندوستان دشمن عناصر کی جانب سے بلوچستان کو غیر مستحکم کرنے، اس کی ترقی میں رکاوٹ ڈالنے اور ریاست و عوام کے درمیان خلیج پیدا کرنے کے لیے استعمال کیے جانے والے غیر ملکی سرپرستی یافتہ پراکسیز ہیں۔ انہوں نے اس عزم کا اعادہ کیا کہ قوم کے اجتماعی عزم اور ریاست کے غیر متزلزل، پُرعزم اور فیصلہ کن ردِعمل کے ذریعے ان مذموم عزائم کو ناکام بنایا جائے گا۔فیلڈ مارشل عاصم منیر نے بلوچستان کی ممتاز شخصیات اور معاشرتی رہنماؤں کے امن کے فروغ، سماجی ہم آہنگی کے استحکام اور تعمیری قومی مکالمے کے فروغ میں کردار کو سراہا۔ انہوں نے اس امر پر زور دیا کہ دشمنانہ پروپیگنڈے کا جامع اور بلاجھجک مقابلہ کیا جائے، جھوٹے بیانیوں کو بے نقاب کیا جائے اور بلوچستان اور اس کے عوام کی حقیقی صلاحیت، ترقی اور امنگوں کو اجاگر کیا جائے۔ انہوں نے واضح کیا کہ بلوچستان کی تقدیر صرف بلوچستان کے عوام کے ہاتھوں میں ہے۔ممتاز شخصیات اور شرکاء نے بلوچستان اور پاکستان کے امن، ترقی اور خوشحالی کے لیے اپنے عزم کا اعادہ کیا