خضدار: نال میں پولٹری سپلائی گاڑی نذرِ آتش، ڈرائیور مبینہ طور پر اغوا

خضدار: ضلع خضدار کے علاقے نال میں مسلح افراد نے پولٹری سپلائی کرنے والی گاڑی کو آگ لگا دی جبکہ ڈرائیور کو مبینہ طور پر اغوا کرکے ساتھ لے گئے۔

ذرائع کے مطابق واقعہ رات گئے پیش آیا، جہاں مسلح افراد نے فرینڈز پولٹری کمپنی کی پک اپ گاڑی کو روکا اور اسے آگ لگا دی۔ گاڑی مرغی کی سپلائی کے بعد خضدار واپس آ رہی تھی۔

کمپنی کے مالک حاجی محمد اسحاق نوتانی کے مطابق مسلح افراد ڈرائیور راوت کرد کو اپنے ساتھ لے گئے۔ انہوں نے واقعے پر شدید تشویش کا اظہار کرتے ہوئے کہا کہ اس سے قبل بھی ایسے واقعات پیش آ چکے ہیں۔

حاجی محمد اسحاق نوتانی نے مطالبہ کیا کہ ملوث افراد کے خلاف کارروائی کی جائے اور ڈرائیور کو فوری بازیاب کرایا جائے۔ انہوں نے کہا کہ واقعے کے خلاف احتجاج کیا جائے گا۔