کنڈ ملیر میں فائر بریگیڈ نہ ہونے سے حادثات کا خطرہ، مستقل اسٹیشن قائم کرنے کا مطالبہ

کنڈ ملیر: بلوچستان کے اہم سیاحتی مقام اور قومی شاہراہ پر واقع کنڈ ملیر میں فائر بریگیڈ کی سہولت نہ ہونے پر شہریوں اور سماجی حلقوں نے تشویش کا اظہار کرتے ہوئے فوری طور پر مستقل فائر بریگیڈ اسٹیشن قائم کرنے کا مطالبہ کیا ہے۔

مقامی ذرائع کے مطابق قومی شاہراہ پر گاڑیوں میں آگ لگنے کے واقعات پیش آتے رہتے ہیں، تاہم علاقے میں فائر بریگیڈ کی سہولت موجود نہ ہونے کے باعث امدادی کارروائیوں میں تاخیر ہوتی ہے۔ اطلاعات کے مطابق آگ لگنے کے واقعات میں قیمتی گاڑیوں اور انسانی جانوں کے ضیاع کے خدشات بڑھ جاتے ہیں۔

مقامی ذرائع کا کہنا ہے کہ کسی بھی حادثے کی صورت میں فائر بریگیڈ اوتھل یا بیلہ سے طلب کی جاتی ہے، لیکن امدادی ٹیموں کو پہنچنے میں لگنے والا وقت نقصان میں اضافے کا سبب بن سکتا ہے۔

اہلیانِ کنڈ ملیر اور سیاسی و سماجی حلقوں نے حکومت بلوچستان، ڈپٹی کمشنر لسبیلہ اور نیشنل ہائی وے اتھارٹی سے مطالبہ کیا ہے کہ علاقے میں فائر بریگیڈ کی مستقل سہولت فراہم کی جائے تاکہ قومی شاہراہ پر سفر کرنے والوں، مقامی آبادی اور سیاحوں کی جان و مال کا تحفظ یقینی بنایا جا سکے۔