کراچی میں گرمی برقرار؛ موسم بدستور خشک رہنے کی پیشگوئی

کراچی: شہر قائد میں گرمی کا سلسلہ برقرار ہے اور محکمہ موسمیات نے آئندہ 24 گھنٹوں کے دوران موسم شدید گرم اور خشک رہنے کی پیشگوئی کردی ہے۔

محکمہ موسمیات کے مطابق کراچی میں کم سے کم درجہ حرارت 21.5 ڈگری سینٹی گریڈ ریکارڈ کیا گیا، جبکہ دن کے اوقات میں درجہ حرارت تیزی سے بڑھنے کا امکان ہے۔

موسمیاتی ماہرین نے پیشگوئی کی ہے کہ شہر میں زیادہ سے زیادہ درجہ حرارت 38 ڈگری سینٹی گریڈ تک پہنچ سکتا ہے۔ اس دوران شمال مشرقی ہوائیں 4 کلومیٹر فی گھنٹہ کی رفتار سے چل رہی ہیں، جبکہ صبح کے وقت ہوا میں نمی کا تناسب 50 فیصد ریکارڈ کیا گیا۔

موسمیاتی اور طبی ماہرین نے شہریوں کو مشورہ دیا ہے کہ گرمی کی شدت سے بچنے کے لیے احتیاطی تدابیر اختیار کریں۔