سرکاری اسپتالوں میں ایچ آئی وی کے بڑھتے کیسز؛ ملک میں طبی ایمرجنسی کا مطالبہ

کراچی: سرکاری اسپتالوں میں بچوں میں ایچ آئی وی کے مبینہ پھیلاؤ کے معاملے پر ملک بھر میں طبی ایمرجنسی نافذ کرنے اور وفاقی سطح پر تحقیقات کا مطالبہ سامنے آگیا۔

متاثرہ بچوں کے وکیل طارق منصور نے وفاقی حکومت کو خط لکھ کر معاملے کی تحقیقات کے لیے مشترکہ تحقیقاتی ٹیم (جے آئی ٹی) تشکیل دینے اور باقاعدہ تحقیقاتی کمیشن قائم کرنے کا مطالبہ کیا ہے۔

طارق منصور کے مطابق ولیکا اسپتال سمیت دیگر سرکاری اسپتالوں میں بچوں میں ایچ آئی وی کے کیسز بڑھنے کی اطلاعات تشویش ناک ہیں۔ انہوں نے مطالبہ کیا کہ پاکستان کمیشن آف انکوائری ایکٹ 2017 کے تحت تحقیقات شروع کی جائیں اور وفاقی تحقیقاتی اداروں کو بھی اس عمل میں شامل کیا جائے۔

خط میں ایف آئی اے، آئی بی، نیب، ملٹری انٹیلی جنس اور آئی ایس آئی کے علاوہ ڈریپ اور قومی ادارہ صحت کو بھی تحقیقات کا حصہ بنانے کی تجویز دی گئی ہے۔

متاثرہ بچوں کے وکیل نے متعلقہ اسپتالوں کے طبی، انتظامی اور مالی ریکارڈ کو محفوظ بنانے اور ان کا فرانزک آڈٹ کرانے کا مطالبہ بھی کیا۔ ان کا کہنا ہے کہ تحقیقاتی کمیشن کی رپورٹ عوام کے سامنے لائی جائے اور ذمہ دار ثابت ہونے والے افراد کے خلاف قانون کے مطابق کارروائی کی جائے۔