مظفرآباد میں مسافر جیپ گہری کھائی میں جاگری، 2 بچوں سمیت 7 افراد جاں بحق

مظفرآباد: آزاد کشمیر کے علاقے مظفرآباد کے نواحی علاقے شکر پٹیاں میں مسافر جیپ گہری کھائی میں گرنے سے دو بچوں سمیت 7 افراد جاں بحق ہوگئے۔ حادثے میں جیپ پر سوار کوئی بھی شخص زندہ نہ بچ سکا۔

ایکسپریس نیوز کے مطابق گھاس سے لدی جیپ شکر پٹیاں سے سیری درہ جا رہی تھی کہ دشوار گزار راستے پر ڈرائیور گاڑی پر قابو نہ رکھ سکا اور جیپ گہری کھائی میں جاگری۔

ریسکیو حکام نے حادثے میں 7 افراد کی ہلاکت کی تصدیق کرتے ہوئے بتایا کہ جائے حادثہ تک پہنچنے میں امدادی ٹیموں کو شدید مشکلات کا سامنا کرنا پڑا۔ جاں بحق ہونے والوں میں ڈرائیور عبدالوحید بھی شامل ہیں۔

حادثے کی اطلاع ملتے ہی امدادی کارروائیاں شروع کی گئیں، تاہم جیپ میں سوار تمام افراد جان کی بازی ہار گئے۔