موجودہ نظام بہترین ہے، مسائل کی وجہ آئین پر عمل نہ کرنا ہے، رانا ثنا اللہ

وزیراعظم کے مشیر برائے سیاسی امور رانا ثنا اللہ نے کہا ہے کہ ملک کا موجودہ پارلیمانی نظام بہترین ہے، جبکہ درپیش مسائل کی اصل وجہ آئین پر مکمل عمل درآمد نہ ہونا ہے۔

نجی ٹی وی پروگرام میں گفتگو کرتے ہوئے رانا ثنا اللہ نے کہا کہ نئے صوبوں کا قیام حکومت کے ایجنڈے کا حصہ نہیں، موجودہ نظام ہی ملک کو چلانے کے لیے کافی ہے۔

انہوں نے آزاد کشمیر انتخابات کو شفاف قرار دیتے ہوئے کہا کہ مسلم لیگ (ن) وہاں حکومت قائم کرے گی۔ ان کا کہنا تھا کہ پنجاب میں ہونے والے ترقیاتی کاموں کے اثرات نے کشمیری عوام کو متاثر کیا، جس کے باعث ن لیگ کو کامیابی ملی۔

انتخابی نتائج کے حوالے سے رانا ثنا اللہ نے کہا کہ پیپلز پارٹی انتخابی عمل میں پروپیگنڈے کے ذریعے شامل ہوئی، تاہم آئندہ مرحلے کے بعد وہ نتائج تسلیم کرنے پر مجبور ہو جائے گی۔

انہوں نے دعویٰ کیا کہ آزاد کشمیر کے اگلے مرحلے میں 10 نشستوں میں سے 7 پر مسلم لیگ (ن) کامیاب ہوگی۔

رانا ثنا اللہ نے کہا کہ 1973 کا آئین اور موجودہ پارلیمانی نظام کئی دہائیوں سے ملک کو متحد رکھے ہوئے ہیں۔ مسائل کا حل نظام کی تبدیلی نہیں بلکہ آئین کی مکمل پاسداری میں ہے۔