خیبرپختونخوا میں سرکاری ملازمین کی بنیادی تنخواہوں میں اضافہ

ویب ڈیسک: خیبرپختونخوا حکومت نے صوبے کے سرکاری ملازمین کے لیے نئے بیسک پے اسکیلز 2026 نافذ کر دیے ہیں، جن کا اطلاق یکم جولائی 2026 سے ہوگا۔ اس سلسلے میں محکمہ خزانہ نے باقاعدہ نوٹیفکیشن بھی جاری کر دیا ہے۔

نوٹیفکیشن کے مطابق صوبائی حکومت نے سرکاری ملازمین کے بنیادی تنخواہی ڈھانچے پر نظرثانی کرتے ہوئے ایڈہاک ریلیف الاؤنس 2022 اور ایڈہاک ریلیف الاؤنس 2025 کو بنیادی تنخواہ میں ضم کر دیا ہے، جس کے نتیجے میں ملازمین کی بنیادی تنخواہوں میں نمایاں اضافہ ہوگا۔

محکمہ خزانہ کے اعلامیے میں کہا گیا ہے کہ بیسک پے اسکیلز 2022 کی جگہ اب بیسک پے اسکیلز 2026 نافذ العمل ہوں گے، جبکہ تمام سرکاری ملازمین کو یکم جولائی 2026 سے نظرثانی شدہ بنیادی تنخواہیں ادا کی جائیں گی۔

یہ فیصلہ صوبائی کابینہ نے بجٹ اجلاس میں منظور کیا تھا، جس کے بعد محکمہ خزانہ نے اس پر عمل درآمد کے لیے نوٹیفکیشن جاری کر دیا۔

حکومت کا کہنا ہے کہ نئے تنخواہی ڈھانچے سے صوبے کے لاکھوں سرکاری ملازمین کو موجودہ معاشی حالات میں مالی ریلیف ملے گا۔