ملک میں پیٹرولیم مصنوعات کی قیمتوں میں ایک ہفتے کے دوران ریکارڈ اضافہ

اسلام آباد: ملک میں ایک ہفتے کے دوران پیٹرولیم مصنوعات کی قیمتوں میں ریکارڈ اضافہ ریکارڈ کیا گیا، جس کے بعد آج سے قیمتوں کے روزانہ تعین کا عمل دوبارہ شروع ہو رہا ہے۔

تفصیلات کے مطابق گزشتہ ایک ہفتے کے دوران پیٹرول کی قیمت میں 24 روپے جبکہ ہائی اسپیڈ ڈیزل کی قیمت میں 60 روپے سے زائد اضافہ کیا گیا۔

عالمی منڈی میں خام تیل کی قیمتوں میں اب کمی کا رجحان سامنے آیا ہے اور گزشتہ روز خام تیل کی قیمتوں میں تقریباً 5 فیصد کمی ریکارڈ کی گئی۔

ذرائع کے مطابق آئل اینڈ گیس ریگولیٹری اتھارٹی (اوگرا) عالمی قیمتوں کے تناسب سے آج نئی قیمتوں کا تعین کرے گی، جس کے نتیجے میں پاکستان میں پیٹرولیم مصنوعات سستی ہونے کا امکان ہے۔

واضح رہے کہ قیمتوں کے روزانہ تعین کے نظام میں دو روزہ وقفے کے بعد آج سے دوبارہ آغاز کیا جا رہا ہے۔