امریکا حملے کرکے اپنی فوجی شکست کی خفت مٹانے کی کوشش کر رہا ہے، پاسداران انقلاب

تہران: ایران کے پاسداران انقلاب نے دعویٰ کیا ہے کہ امریکا اپنی فوجی ناکامی کا بدلہ لینے کے لیے ایران کے خلاف حملے جاری رکھے ہوئے ہے، تاہم ایرانی مسلح افواج ان حملوں کا بھرپور جواب دے رہی ہیں۔

پاسداران انقلاب کے سیاسی امور کے نائب کمانڈر بریگیڈیئر جنرل یداللہ جیوانی نے اپنے بیان میں کہا کہ خطے میں موجود امریکی فوجی اڈوں کو نشانہ بنایا گیا ہے اور یہ کارروائیاں جاری رہیں گی۔

انہوں نے کہا کہ امریکا جنگ میں اپنی مبینہ شکست کا ازالہ کرنے کے لیے حملے کر رہا ہے اور آبنائے ہرمز میں سابقہ صورتحال بحال کرنے کی کوشش کر رہا ہے، تاہم وہ اپنے مقاصد میں کامیاب نہیں ہوگا۔

ایرانی کمانڈر نے دعویٰ کیا کہ آبنائے ہرمز پر ایران کا کنٹرول خطے میں طاقت کے توازن کو تبدیل کر چکا ہے۔ ان کے مطابق امریکا اس صورتحال کو چیلنج کرنے کے لیے فوجی دباؤ اور دیگر اقدامات کر رہا ہے، تاہم ایران اس اہم بحری راستے پر اپنا اختیار برقرار رکھے ہوئے ہے۔

یداللہ جیوانی کا کہنا تھا کہ ایرانی مسلح افواج نے فوجی اور دیگر اہداف پر ہونے والے حملوں کا جواب دیا ہے اور آئندہ بھی کسی بھی کارروائی کا بھرپور ردعمل دیا جائے گا۔

انہوں نے مزید کہا کہ خطے میں جاری کشیدگی نے نئی جیوپولیٹیکل صورتحال پیدا کر دی ہے اور ایران اپنے مفادات کے تحفظ کے لیے اقدامات جاری رکھے گا۔