کوئٹہ: ینگ ڈاکٹرز کا ایمرجنسی سمیت تمام طبی سروسز کے بائیکاٹ کا اعلان

کوئٹہ: ینگ ڈاکٹرز ایسوسی ایشن بلوچستان نے ایمرجنسی سمیت تمام طبی سروسز کے بائیکاٹ کا فیصلہ کر لیا ہے۔ ینگ ڈاکٹرز کے رہنما ڈاکٹر بہار شاہ نے کہا ہے کہ موجودہ حالات میں ڈاکٹرز کے لیے ہسپتالوں میں کام کرنا ممکن نہیں رہا، اس لیے سخت فیصلے کرنے پر مجبور ہو گئے ہیں۔

ڈاکٹر بہار شاہ نے الزام عائد کیا کہ “ایک سیکرٹری کو بچانے کے لیے پورا نظام استعمال کیا جا رہا ہے”، جبکہ ڈاکٹرز کے مسائل کے حل کے لیے سنجیدہ اقدامات نہیں کیے جا رہے۔

انہوں نے کہا کہ ینگ ڈاکٹرز کو احتجاج کے سخت مرحلے کی طرف دھکیل دیا گیا ہے اور اب وہ اپنے مطالبات کے حصول کے لیے مزید اقدامات کریں گے۔

ینگ ڈاکٹرز کے فیصلے سے صوبے کے سرکاری ہسپتالوں میں مریضوں کو درپیش مشکلات میں اضافے کا خدشہ پیدا ہو گیا ہے، جبکہ اس حوالے سے محکمہ صحت یا حکومت بلوچستان کا مؤقف تاحال سامنے نہیں آیا۔