گاڑیوں پر ٹیکس کم، قیمتوں میں کتنی کمی آئے گی؟

اسلام آباد: وفاقی حکومت یکم جولائی 2026 سے فنانس بل 2026-27 کے تحت گاڑیوں پر درآمدی ڈیوٹی اور ٹیکس کی نئی شرحیں نافذ کر رہی ہے، جس کے تحت مختلف کیٹیگریز میں مجموعی ٹیکس اور ڈیوٹی میں نمایاں کمی کی گئی ہے۔ تاہم ماہرین کا کہنا ہے کہ اس کے باوجود گاڑیوں کی قیمتوں میں بڑی کمی کی توقع نہیں کی جا سکتی۔

نئی پالیسی کے مطابق 1800 سی سی گاڑیوں پر مجموعی ڈیوٹی و ٹیکس 156 فیصد سے کم ہو کر 74 فیصد، 1500 سے 1800 سی سی گاڑیوں پر 91 فیصد سے 57 فیصد، 1000 سے 1500 سی سی گاڑیوں پر 76 فیصد سے 52 فیصد، جبکہ 850 سی سی گاڑیوں پر 66 فیصد سے کم ہو کر 42 فیصد رہ جائے گا۔ فنانس بل میں 1800 سی سی تک کی گاڑیوں پر اسپیشل ایکسائز ڈیوٹی ختم کرنے کی تجویز بھی شامل ہے۔

آٹو سیکٹر کے ماہرین کے مطابق مجموعی ٹیرف میں کمی کا مطلب یہ نہیں کہ گاڑیوں کی قیمتیں بھی اسی تناسب سے کم ہوں گی، کیونکہ گاڑی کی حتمی قیمت میں سیلز ٹیکس، کسٹمز ڈیوٹی، فیڈرل ایکسائز ڈیوٹی اور دیگر چارجز بھی شامل ہوتے ہیں۔

ماہرین کا کہنا ہے کہ جاپان سے درآمد ہونے والی استعمال شدہ گاڑیوں کی عمر کی حد میں ممکنہ نرمی سے نسبتاً کم قیمت گاڑیوں کی درآمد بڑھ سکتی ہے، جس سے صارفین کو کچھ ریلیف ملنے کا امکان ہے۔

معاشی ماہرین کے مطابق حکومت نے آٹو ٹیرف میں نمایاں کمی ضرور کی ہے، تاہم مارکیٹ میں قیمتوں پر اس کے حقیقی اثرات کا انحصار نئی آٹو پالیسی، ٹیکسوں کے مکمل نفاذ اور مارکیٹ کے ردعمل پر ہوگا۔ اس لیے صارفین کو فوری اور بڑی قیمتوں میں کمی کی توقع نہیں رکھنی چاہیے۔