کوئٹہ: ایرانی پیٹرول 320 روپے فی لیٹر، قیمتوں میں اضافے پر شہریوں میں تشویش

کوئٹہ میں ایرانی پیٹرول کی قیمت میں مسلسل اضافے کا سلسلہ جاری ہے، جہاں فی لیٹر قیمت بڑھ کر 320 روپے تک پہنچ گئی ہے۔ بڑھتے ہوئے نرخوں نے شہریوں کو شدید پریشانی میں مبتلا کر دیا ہے، جبکہ عوام نے متعلقہ اداروں سے فوری نوٹس لینے کا مطالبہ کیا ہے۔

شہریوں کا کہنا ہے کہ ایرانی پیٹرول کی قیمتیں مسلسل بڑھ رہی ہیں، لیکن اس صورتحال پر قابو پانے کے لیے متعلقہ حکام کی جانب سے مؤثر اقدامات نظر نہیں آ رہے۔ بعض شہریوں نے ضلعی انتظامیہ کی کارکردگی پر بھی سوالات اٹھاتے ہوئے مطالبہ کیا کہ قیمتوں کو قابو میں لانے کے لیے عملی اقدامات کیے جائیں۔

شہریوں نے حکومت اور ضلعی انتظامیہ سے اپیل کی ہے کہ یا تو ایرانی پیٹرول کی بڑھتی ہوئی قیمتوں میں کمی کے لیے مؤثر حکمت عملی اختیار کی جائے یا پھر اس کی غیر قانونی خرید و فروخت کے خلاف قانون کے مطابق سخت کارروائی عمل میں لائی جائے تاکہ عوام کو ریلیف مل سکے۔

دوسری جانب اس معاملے پر ضلعی انتظامیہ کا مؤقف تاحال سامنے نہیں آیا۔