سول لائن پولیس کی کارروائی، جادو ٹونے کے نام پر شہریوں سے رقم بٹورنے والا مبینہ عامل گرفتار

کوئٹہ: سول لائن پولیس نے کارروائی کرتے ہوئے جادو ٹونے، تعویذ گنڈوں اور عملیات کے نام پر شہریوں کو مبینہ طور پر دھوکہ دینے والے ایک شخص کو گرفتار کر لیا۔

ایس ایچ او سول لائن جواد حیدر کی نگرانی میں کی گئی کارروائی کے دوران ملزم کے قبضے سے تعویذ، گڑیاں، تالے اور دیگر مشکوک اشیاء برآمد ہونے کا دعویٰ کیا گیا ہے۔ پولیس کے مطابق ملزم مبینہ طور پر عملیات اور جادو ٹونے کے ذریعے لوگوں کے مسائل حل کرنے اور قسمت بدلنے کے دعوے کر کے رقم وصول کرتا تھا۔

پولیس کا کہنا ہے کہ برآمد شدہ سامان کو تحویل میں لے کر تحقیقات کا آغاز کر دیا گیا ہے جبکہ ملزم سے مختلف پہلوؤں پر پوچھ گچھ جاری ہے۔

حکام کے مطابق ملزم کے خلاف قانون کے مطابق کارروائی عمل میں لائی جا رہی ہے اور مزید شواہد کی روشنی میں تفتیش کا دائرہ بڑھایا جا سکتا ہے۔