خضدار پولیس کی کارروائی، کیسکو کی چوری شدہ تاریں برآمد، دو ملزمان گرفتار

خضدار: کوئٹہ الیکٹرک سپلائی کمپنی (کیسکو) کی بجلی کی مین لائنوں اور ٹرانسمیشن لائنوں سے کنڈکٹرز (تاریں) اور دیگر برقی سامان کی چوری کے بڑھتے ہوئے واقعات کے خلاف خضدار پولیس نے کامیاب کارروائی کرتے ہوئے دو ملزمان کو گرفتار کر لیا۔

پولیس کے مطابق کارروائی کے دوران ایک ڈبل کیبن گاڑی سے 11 کے وی فیڈرز کے چوری شدہ کنڈکٹرز برآمد کیے گئے۔ ابتدائی تحقیقات کے مطابق برآمد شدہ تاریں ضلع خضدار کے علاقوں کرخ اور کہوری سے گزشتہ تین ماہ کے دوران چوری کی گئی تھیں۔

کیسکو حکام کا کہنا ہے کہ بجلی کی تاروں اور برقی سامان کی چوری کے باعث نہ صرف بجلی کی فراہمی متاثر ہوتی ہے بلکہ ادارے کو بھاری مالی نقصان کا بھی سامنا کرنا پڑتا ہے۔

پولیس نے ملزمان کو گرفتار کرکے ان کے خلاف مقدمہ درج کر لیا ہے جبکہ مزید تحقیقات جاری ہیں تاکہ اس چوری میں ملوث دیگر افراد اور ممکنہ نیٹ ورک کا بھی سراغ لگایا جا سکے۔

کیسکو حکام نے عوام سے اپیل کی ہے کہ بجلی کے نظام کو نقصان پہنچانے والے عناصر کی نشاندہی میں قانون نافذ کرنے والے اداروں کے ساتھ تعاون کریں تاکہ ایسے جرائم کا مؤثر سدباب ممکن بنایا جا سکے۔