کوئٹہ: تیزاب پھینکنے کے واقعہ میں مطلوب ملزم پولیس مقابلے میں ہلاک،ذرائع

کوئٹہ: خاتون ڈاکٹر پر تیزاب پھینکنے کے واقعہ میں مطلوب ملزم ہمایوں شاہ پولیس مقابلے میں ہلاک ہوگیا۔

پولیس کے مطابق ملزم کی گرفتاری کے لیے ضلع بھر میں سرچ آپریشن جاری تھا۔ دورانِ کارروائی نوشکی بس اسٹاپ کے قریب ملزم کی موجودگی کی اطلاع پر پولیس ٹیم موقع پر پہنچی اور اسے ہتھیار ڈال کر گرفتاری دینے کا کہا۔

پولیس حکام کے مطابق ملزم نے گرفتاری دینے کے بجائے پولیس پارٹی پر فائرنگ شروع کر دی، جس پر پولیس نے جوابی کارروائی کی۔ فائرنگ کے تبادلے کے نتیجے میں مطلوب ملزم ہمایوں شاہ ہلاک ہوگیا۔

پولیس نے ملزم کے قبضے سے ایک پستول اور چار زندہ کارتوس برآمد کر لیے، جبکہ جائے وقوعہ سے دو خول بھی تحویل میں لے لیے گئے ہیں۔

پولیس کا کہنا ہے کہ واقعہ کے حوالے سے مزید قانونی کارروائی جاری ہے جبکہ تفتیشی ٹیمیں کیس کے دیگر پہلوؤں کا بھی جائزہ لے رہی ہیں۔