کوئٹہ سول ہسپتال میں لیڈی ڈاکٹر پر تیزاب حملہ، وزیراعلیٰ بلوچستان نے نوٹس لے لیا

وزیراعلیٰ بلوچستان میر سرفراز بگٹی نے سول اسپتال کوئٹہ میں لیڈی پی جی ڈاکٹر پر تیزاب پھینکنے کے افسوسناک واقعے کا نوٹس لیتے ہوئے فوری رپورٹ طلب کر لی ہے معاون وزیراعلیٰ بلوچستان شاہد رند کے مطابق واقعے کے بعد متاثرہ لیڈی ڈاکٹر کو بہتر علاج معالجے کے لیے آریا انسٹی ٹیوٹ آف میڈیکل سائنسز کوئٹہ منتقل کر دیا گیا ہے، جبکہ ان کی حالت کے پیش نظر کراچی منتقلی کے لیے ائیر ایمبولینس بھی تیار رکھی گئی ہے انہوں نے بتایا کہ وزیراعلیٰ بلوچستان نے متاثرہ ڈاکٹر کو ہر ممکن بہترین طبی سہولیات فراہم کرنے اور مکمل معاونت یقینی بنانے کی ہدایت کی ہے شاہد رند کے مطابق واقعے کی مختلف پہلوؤں سے تحقیقات جاری ہیں جبکہ سی سی ٹی وی فوٹیجز کی مدد سے ملزم کی شناخت کا عمل تیز کر دیا گیا ہے۔ قانون نافذ کرنے والے اداروں کو ملزم کی فوری گرفتاری کے خصوصی احکامات جاری کر دیے گئے ہیں انہوں نے واضح کیا کہ ملزم کو ہر صورت گرفتار کرکے قانون کے مطابق سخت سزا دلوائی جائے گی۔ معاون وزیراعلیٰ نے کہا کہ خواتین ڈاکٹروں اور طبی عملے کے تحفظ پر کوئی سمجھوتہ نہیں کیا جائے گا اور اس حوالے سے تمام ضروری اقدامات کیے جا رہے ہیں۔