کندھ کوٹ کے شہید فوجی اہلکار محبت علی میرانی کی نماز جنازہ فوجی اعزاز کے ساتھ ادا

کندھ کوٹ(نامہ نگار) کوئٹہ میں پیش آنے والے افسوسناک بم دھماکے میں شہید ہونے والے فوجی اہلکار کندھ کوٹ کے رہائشی محبت علی میرانی کی نمازِ جنازہ فوجی اعزاز کے ساتھ ادا کی گئی۔نمازِ جنازہ میں ایڈیشنل ڈپٹی کمشنر کشمور ایٹ کندھ کوٹ مسرور احمد بجارانی، پاک فوج کے افسران، مختلف محکموں کے افسران، سیاسی و سماجی شخصیات سمیت گاؤں والوں نے بڑی تعداد میں شرکت کی۔
اس موقع پر پاک فوج کے چاق و چوبند دستے کی جانب سے شہید محبت علی میرانی کو گارڈ آف آنر پیش کیا گیا، جبکہ فضا “پاک فوج زندہ باد” اور “شہید کو سلام” کے نعروں سے گونج اٹھی۔
شرکاء نے شہید کی قربانی کو زبردست خراجِ عقیدت پیش کرتے ہوئے کہا کہ وطن کی حفاظت کے لیے جان قربان کرنے والے یہ بہادر سپاہی قوم کے اصل ہیرو ہیں، جن کی قربانیوں کو ہمیشہ یاد رکھا جائے گا۔
بعد ازاں شہید محبت علی میرانی کی میت کو ان کے آبائی گاؤں بگن قمبرانی میں سپردِ خاک کر دیا گیا۔آخر میں شہید کے درجات کی بلندی، لواحقین کے لیے صبرِ جمیل اور ملک میں امن و امان کی بحالی کے لیے خصوصی دعائیں بھی کی گئیں۔