سیکیورٹی اداروں کی کارروائی؛ بھارتی ایجنسی کے لیے جاسوسی کرنے والے 3 افراد گرفتار

اسلام آباد: پاکستان کے سیکیورٹی اداروں نے بڑی کارروائی کرتے ہوئے بھارتی خفیہ ایجنسی ’را‘ کے لیے مبینہ جاسوسی میں ملوث 3 افراد کو گرفتار کر لیا۔

ذرائع کے مطابق گرفتار افراد کا تعلق نارووال، بہاولپور اور ضلع نیلم آزاد کشمیر سے ہے، جنہیں خفیہ معلومات کے حصول کے لیے استعمال کیا جا رہا تھا۔

تحقیقات کے دوران ملزمان نے اہم انکشافات کرتے ہوئے اعتراف کیا کہ انہیں سوشل میڈیا کے ذریعے خواتین اور مالی فوائد کا لالچ دے کر حساس معلومات تک رسائی حاصل کی گئی۔

ذرائع کا کہنا ہے کہ ملزمان کو ادائیگیاں ایزی پیسہ، کرپٹو والٹس اور بینک اکاؤنٹس کے ذریعے کی جاتی رہیں، جبکہ وہ بھارتی ایجنسی سے منسلک خواتین کے ساتھ مسلسل رابطے میں تھے۔

حکام کے مطابق ملزمان کے خلاف آفیشل سیکرٹ ایکٹ کے تحت مقدمہ درج کر کے قانونی کارروائی مکمل کی گئی اور انہیں سزائیں سنا دی گئی ہیں۔

دفاعی ماہرین کا کہنا ہے کہ بھارت ہنی ٹریپ اور مالی لالچ جیسے حربوں کے ذریعے عام شہریوں کو اپنے مقاصد کے لیے استعمال کر رہا ہے۔

انہوں نے عوام کو خبردار کیا ہے کہ سوشل میڈیا کے استعمال میں احتیاط برتیں اور کسی بھی مشکوک سرگرمی یا رابطے کی فوری اطلاع متعلقہ اداروں کو دیں۔