جنگ بندی کیلئے پاکستان کی سفارتی کوششیں اہم مرحلے میں داخل ہو گئیں، ایرانی سفیر کا انکشاف

اسلام آباد (ویب ڈیسک): پاکستان میں تعینات ایرانی سفیر رضا امیری مقدم نے انکشاف کیا ہے کہ خطے میں جاری کشیدگی کے خاتمے کے لیے پاکستان کی سفارتی کوششیں ایک اہم اور فیصلہ کن مرحلے میں داخل ہو چکی ہیں۔

سوشل میڈیا پر جاری اپنے بیان میں ایرانی سفیر نے کہا کہ پاکستان کی جانب سے کیے گئے خیرسگالی اقدامات اور مسلسل سفارتی رابطے مثبت سمت میں پیش رفت کر رہے ہیں۔ ان کے مطابق اب یہ عمل ایک حساس مرحلے میں داخل ہو چکا ہے، جس کے نتائج جلد سامنے آنے کی توقع ہے۔

رضا امیری مقدم نے عندیہ دیا کہ ان سفارتی کوششوں کی مزید تفصیلات جلد عوام کے سامنے لائی جائیں گی، جس سے خطے میں امن کی امیدیں مزید مضبوط ہو سکتی ہیں۔

تجزیہ کاروں کا کہنا ہے کہ پاکستان اس وقت مشرق وسطیٰ میں بڑھتی ہوئی کشیدگی کو کم کرنے کے لیے فعال کردار ادا کر رہا ہے اور مختلف فریقین کے درمیان مذاکرات کو آگے بڑھانے کی سنجیدہ کوششیں جاری ہیں۔

ایرانی سفیر کا یہ بیان ایسے وقت میں سامنے آیا ہے جب خطے میں جاری تناؤ کے باعث عالمی سطح پر جنگ بندی اور سفارتی حل کے لیے سرگرمیاں تیز ہو چکی ہیں۔