کوئٹہ: پارلیمانی سیکرٹری برائے ٹرانسپورٹ میر لیاقت لہڑی نے کہا ہے کہ پاکستان پیپلز پارٹی بلا رنگ و نسل عوام کی خدمت پر یقین رکھتی ہے اور علاقے کی ترقی و عوام کے مسائل کا حل ان کی ترجیحات میں شامل ہے، جس کے لیے تمام دستیاب وسائل بروئے کار لائے جا رہے ہیں۔
یہ بات انہوں نے جمعہ کے روز لہڑی ہاؤس کوئٹہ میں پاکستان پیپلز پارٹی کے کارکنوں، سیاسی و سماجی شخصیات کے وفود سے ملاقات کے دوران گفتگو کرتے ہوئے کہی۔ اس موقع پر وفود نے اپنے علاقوں کو درپیش مسائل خصوصاً سڑکوں کی مرمت، نکاسی آب اور دیگر بنیادی سہولیات کے بارے میں آگاہ کیا۔
میر لیاقت لہڑی نے وفود کے مسائل غور سے سنے اور ان کے حل کے لیے اقدامات کی یقین دہانی کرائی۔ انہوں نے کہا کہ عوامی خدمت ہی ان کی سیاست کا بنیادی مقصد ہے اور عوام کے مسائل کا حل ان کی اولین ترجیح ہے۔
انہوں نے مزید کہا کہ عوام کے اعتماد سے علاقے میں مزید ترقیاتی منصوبے شروع کیے جائیں گے جبکہ گزشتہ دو سال کے دوران حلقے میں اربوں روپے کے ترقیاتی کام مکمل کیے گئے ہیں اور کئی منصوبوں پر تیزی سے کام جاری ہے جن کی تکمیل سے عوام کو مزید سہولیات میسر آئیں گی۔
