خضدار: ڈی آئی جی اور ایس ایس پی کے قافلے پر مسلح افراد کی فائرنگ، 3 پولیس اہلکار زخمی

خضدار، تحصیل کرخ میں ڈی آئی جی اور ایس ایس پی کے قافلے پر مسلح افراد کی فائرنگ، 3 پولیس اہلکار زخمی
خضدار(یو این اے)ضلع خضدار کی تحصیل کرخ میں ڈی آئی جی خضدار رینج عمران قریشی اور ایس ایس پی خضدار کے سیکیورٹی قافلے پر نامعلوم مسلح افراد نے حملہ کر کے فائرنگ کر دی، جس کے نتیجے میں تین پولیس اہلکار زخمی ہو گئے، تاہم دونوں سینئر پولیس افسران محفوظ رہے۔تفصیلات کے مطابق گزشتہ روز کرخ پولیس تھانے پر ہونے والے بم دھماکے کے بعد ڈی آئی جی خضدار عمران قریشی اور ایس ایس پی خضدار بھاری نفری کے ہمراہ صورتِ حال کا جائزہ لینے اور جائے وقوعہ کے معائنے کے لیے پہنچے تھے۔ذرائع نے بتایا کہ معائنے کے بعد واپسی کے دوران قبل از وقت گھات لگائے نامعلوم مسلح ملزمان نے پولیس افسران کے قافلے پر اندھا دھند فائرنگ کر دی۔ شدید فائرنگ کے نتیجے میں گاڑیوں کی حفاظت پر مامور 3 پولیس اہلکار گولیوں کی زد میں آ کر زخمی ہو گئے۔واقعے کے فورا بعد پولیس اور سیکیورٹی فورسز کی جانب سے کی جانے والی شدید جوابی فائرنگ کے باعث حملہ آور موقع سے پہاڑی سلسلوں کی جانب فرار ہونے میں کامیاب ہو گئے۔تمام زخمی اہلکاروں کو فوری طور پر طبی امداد کے لیے قریبی اسپتال منتقل کر دیا گیا ہے، جہاں ان کی حالت خطرے سے باہر بتائی جاتی ہے۔ واقعہ کے بعد علاقے کی ناپابندی کر کے حملہ آوروں کی تلاش کے لیے سرچ آپریشن شروع کر دیا گیا ہے۔