سرکاری محکموں کی کارکردگی میں بہتری کے لیے اصلاحات کو عملی نتائج سے جوڑنا ضروری ہے، وزیر اعلیٰ بلوچستان

کوئٹہ: وزیر اعلیٰ بلوچستان میر سرفراز بگٹی کی زیر صدارت سرکاری محکموں کی کارکردگی کے جائزے اور اصلاحات سے متعلق اجلاس دوسرے روز بھی جاری رہا، جس میں انتظامی امور کی بہتری، محکموں کی تنظیم نو اور عوامی خدمات کی فراہمی مؤثر بنانے کے لیے مختلف تجاویز کا جائزہ لیا گیا۔
اجلاس میں چیف سیکرٹری بلوچستان شکیل قادر خان نے مختلف سرکاری محکموں کی کارکردگی، انتظامی امور اور درپیش مسائل کے حوالے سے تفصیلی بریفنگ دی۔
اجلاس کے دوران سرکاری مشینری کو زیادہ فعال اور جواب دہ بنانے، محکموں کے درمیان رابطہ کاری بہتر کرنے اور فرائض کی انجام دہی میں حائل غیر ضروری رکاوٹیں دور کرنے سے متعلق تجاویز پر غور کیا گیا۔ اس کے علاوہ محکموں کی تنظیم نو، انتظامی ڈھانچے کو مؤثر بنانے اور سرکاری وسائل کے بہتر استعمال کے امور بھی زیر بحث آئے۔
وزیر اعلیٰ بلوچستان میر سرفراز بگٹی نے کہا کہ سرکاری محکموں کی کارکردگی میں بہتری کے لیے اصلاحات کو عملی نتائج سے ہم آہنگ کرنا ضروری ہے۔ عوامی وسائل کا مؤثر استعمال اور سرکاری اداروں کی استعدادِ کار میں اضافہ بہتر طرز حکمرانی کے لیے ناگزیر ہے۔
انہوں نے کہا کہ محکموں کی ذمہ داریوں اور دائرہ کار کا واضح اور مؤثر تعین انتظامی امور میں بہتری اور کارکردگی بڑھانے میں معاون ثابت ہوگا۔ سرکاری اداروں کی کارکردگی کو قابلِ پیمائش نتائج سے منسلک کرنا بھی ضروری ہے تاکہ اصلاحات کے حقیقی اثرات کا جائزہ لیا جا سکے۔
وزیر اعلیٰ نے واضح کیا کہ اصلاحات کا بنیادی مقصد سرکاری اداروں کو زیادہ مؤثر بنانا اور عوام کو بروقت اور معیاری خدمات کی فراہمی یقینی بنانا ہے۔