دیہی خواتین بلوچستان کی معیشت، زراعت اور معاشرتی ترقی میں اہم کردار ادا کر رہی ہیں، سرفراز بگٹی

کوئٹہ: وزیراعلیٰ بلوچستان میر سرفراز بگٹی نے دیہی خواتین کے عالمی دن کے موقع پر بلوچستان کی دیہی خواتین کی خدمات کو خراج تحسین پیش کرتے ہوئے کہا ہے کہ دیہی خواتین صوبے کی معیشت، زراعت اور معاشرتی ترقی میں اہم کردار ادا کر رہی ہیں۔
سماجی رابطے کی ویب سائٹ ایکس پر اپنے پیغام میں وزیراعلیٰ نے کہا کہ خواتین کو معاشی طور پر خودمختار بنانا اور انہیں ترقی کے مساوی مواقع فراہم کرنا حکومت بلوچستان کا عزم ہے۔ حکومت خواتین کی معاشی خودمختاری، ہنرمندی اور کاروباری صلاحیتوں کے فروغ کے لیے عملی اقدامات کر رہی ہے۔
میر سرفراز بگٹی نے کہا کہ رائز پروگرام، وومن بازارز اور خواتین کے معاشی خودمختاری فنڈ کے ذریعے خواتین کے لیے نئے مواقع پیدا کیے جا رہے ہیں۔ خواتین کاروباری شخصیات کی معاونت کے لیے آرٹیفیشل انٹیلیجنس لیب اور کاروباری تربیت کے پروگرام بھی اہم اقدامات ہیں۔
وزیراعلیٰ بلوچستان نے کہا کہ دیہی اور دور دراز علاقوں میں رہنے والی خواتین کو تعلیم، صحت، روزگار اور مالی وسائل تک رسائی فراہم کرنا ضروری ہے۔ زراعت، لائیو اسٹاک، آبی وسائل کے تحفظ اور پائیدار ذرائع معاش کے فروغ کے ذریعے دیہی خواتین کو مزید بااختیار بنایا جا سکتا ہے۔
انہوں نے کہا کہ خواتین کی معاشی خودمختاری سے خاندان مضبوط اور معاشرہ خوشحال ہوتا ہے۔ بااختیار دیہی خواتین ہی خوشحال بلوچستان کی بنیاد ہیں، اس لیے خواتین کو ترقی کے عمل میں مؤثر کردار ادا کرنے کے لیے مساوی مواقع فراہم کرنا ناگزیر ہے۔