سوات؛ سی ٹی ڈی اور پولیس کا مشترکہ آپریشن، ٹی ٹی پی سے تعلق رکھنے والے 3دہشتگرد ہلاک

سوات (ویب ڈیسک): سوات میں سی ٹی ڈی اور ضلعی پولیس نے مشترکہ کارروائی کے دوران کالعدم تحریک طالبان پاکستان (ٹی ٹی پی) سے تعلق رکھنے والے 3 مطلوب دہشت گردوں کو ہلاک کردیا، جبکہ دو فرار ہونے میں کامیاب ہوگئے۔

ترجمان سی ٹی ڈی کے مطابق انٹیلی جنس بیسڈ آپریشن علی الصبح تھانہ کانجو کی حدود میں واقع علاقے سخاڈوب میں کیا گیا۔ ہلاک دہشت گردوں کی شناخت عبداللہ ولد سید بشر، منصور علی ولد عبدالمطلب اور غفران اللہ ولد افضل خان کے ناموں سے ہوئی ہے۔ تینوں کا تعلق سوات سے بتایا گیا ہے اور وہ ٹی ٹی پی کمانڈر مظفر عرف خالد کے گروپ سے وابستہ تھے۔

ترجمان کے مطابق پولیس اہلکاروں کو دیکھتے ہی دہشت گردوں نے فائرنگ شروع کردی، جس پر فورسز نے جوابی کارروائی کی۔ فائرنگ رکنے کے بعد مکان سے تین دہشت گردوں کی لاشیں ملیں، جبکہ دو ملزمان فرار ہوگئے۔

کارروائی کے دوران دہشت گردوں کے قبضے سے تین کلاشنکوفیں، چھ میگزین اور متعدد کارتوس برآمد کیے گئے۔ موقع سے گیس سلنڈر، کھانے پینے کے برتنوں کے علاوہ تھانہ شکردرہ کا نقشہ اور ایک ڈائری بھی ملی۔

سی ٹی ڈی کے مطابق ہلاک دہشت گرد رواں سال فائرنگ کے متعدد واقعات میں ملوث تھے۔ ان میں افضل خان گجر پر حملہ، نعمت علی خان کے گھر اور ڈیرے پر فائرنگ اور سلیم اللہ عرف ساجد نیلا گرام کی ٹارگٹ کلنگ شامل ہیں۔

آئی جی خیبر پختونخوا ذوالفقار حمید اور ایڈیشنل آئی جی سی ٹی ڈی نے کارروائی میں حصہ لینے والے اہلکاروں کی کارکردگی کو سراہتے ہوئے کہا کہ صوبے میں دہشت گردی کے خاتمے اور عوام کے جان و مال کے تحفظ کے لیے اقدامات جاری رہیں گے۔