بیرسٹر گوہر کا بانی پی ٹی آئی کے آفیشل ایکس اکاؤنٹ سے لا تعلقی کا اظہار

اسلام آباد (ویب ڈیسک): بانی پی ٹی آئی عمران خان کے ایکس اکاؤنٹ سے متعلق کیس میں چیئرمین پی ٹی آئی بیرسٹر گوہر نے عدالت میں کہا ہے کہ پارٹی اس اکاؤنٹ کی ملکیت کا دعویٰ نہیں کرتی۔ انہوں نے مؤقف اختیار کیا کہ حالات تبدیل ہوچکے ہیں، اس لیے جواب جمع کرانے کے لیے کچھ وقت دیا جائے۔

اسلام آباد ہائی کورٹ میں جسٹس ارباب محمد طاہر نے غلام مرتضیٰ کی درخواست پر سماعت کی۔ اس موقع پر بیرسٹر گوہر علی خان ذاتی حیثیت میں عدالت میں پیش ہوئے، جبکہ بانی پی ٹی آئی کے وکلا خالد یوسف چودھری اور شمسہ کیانی سمیت این سی سی آئی اے کے حکام بھی موجود تھے۔

سماعت کے دوران جسٹس ارباب محمد طاہر نے بیرسٹر گوہر سے کہا کہ انہیں ذاتی حیثیت میں طلب نہیں کیا گیا تھا اور وہ تحریری جواب بھی جمع کرا سکتے تھے۔ اس پر بیرسٹر گوہر نے واضح کیا کہ پی ٹی آئی اس ایکس اکاؤنٹ کو اپنا تسلیم نہیں کرتی۔

چیئرمین پی ٹی آئی نے عدالت سے استدعا کی کہ حالات تبدیل ہوگئے ہیں، اس لیے کچھ مہلت دی جائے تاکہ تفصیلی جواب جمع کرایا جاسکے۔ عدالت نے انہیں جواب جمع کرانے کے لیے وقت دیتے ہوئے ہدایت کی کہ اپنا مؤقف تحریری طور پر پیش کریں۔

بعد ازاں عدالت نے کیس کی مزید سماعت 23 نومبر تک ملتوی کردی۔