گوجرخان میں گیس بلاسٹ سے جھلسنے والے سرکاری ملازم شبیر حیدر کے جاں بحق ہونے پر شفاف انکوائری کا مطالبہ

لاھور( نمائندہ خصوصی سے)گوجرخان میں پیش آنے والا یہ دلخراش واقعہ صرف ایک حادثہ نہیں بلکہ کھلی غفلت، نااہلی اور انسانی جان کی سنگین بےقدری کی بدترین مثال ہے۔ سپورٹس سٹیڈیم کا ملازم شبیر حیدر، جسے مبینہ طور پر غیرقانونی طور پر اسسٹنٹ کمشنر گوجرخان کے گھر پر بطور کک تعینات کیا گیا تھا، گیس بلاسٹ کے باعث بری طرح جھلس گیا، مگر افسوسناک طور پر اسے فوری طور پر کسی برن سنٹر منتقل کرنے کے بجائے مبینہ طور پر حقیقت چھپانے کے لیئے تحصیل ہیڈکوارٹر ہسپتال میں رکھا گیا۔ جب اس کی حالت بگڑ کر نازک حد تک پہنچ گئی تو اسے پمز ہسپتال اسلام آباد منتقل کیا گیا، مگر تب تک بہت دیر ہو چکی تھی اور وہ زندگی کی بازی ہار گیا۔ سوال یہ ہے کہ ایک سرکاری ملازم کو غیرقانونی طور پر نجی کام پر کیوں لگایا گیا؟ اور زخمی ہونے کے بعد اس کی جان بچانے کے بجائے معاملہ دبانے کی کوشش کیوں کی گئی؟ ابتدائی طور پر تین لاکھ اور بعد میں محض پچاس ہزار روپے دے کر کیا ایک قیمتی انسانی جان کا مداوا کیا جا سکتا ہے؟ یہ واقعہ انتظامیہ کی مجرمانہ اور غریب ملازم کے ساتھ ظلم کی واضح مثال ہے، جس پر فوری اور شفاف انکوائری اور ذمہ داران کے خلاف سخت کارروائی ناگزیر ہے۔ مرحوم ملازم کی بیوہ نے وزیر اعظم پاکستان میاں شہباز شریف سے درد مندانہ اپیل کی ہے کہ وہ ان کے ساتھ ہونے والی ناانصافی کا ازالہ انصاف دے کر کریں۔ اس حادثے کو ہوئے چار ماہ ہو چکے ہیں۔