جنرل فیض، جنرل باجوہ بیٹھے تھے، دہشتگردوں کو واپس لانے کےلیے ہمیں قائل کرنےکی کوشش کی، خواجہ آصف

اسلام آباد (ویب ڈیسک): وزیر دفاع خواجہ آصف نے قومی اسمبلی میں خطاب کرتے ہوئے سابق وزیراعظم عمران خان کو تنقید کا نشانہ بنایا اور کہا کہ شادیوں میں میراثی بھی اتنی تعریف نہیں کرتے جتنی عمران خان بطور وزیراعظم سابق آرمی چیف جنرل (ر) قمر جاوید باجوہ کی کیا کرتے تھے۔

خیبرپختونخوا میں ایمرجنسی کے نفاذ سے متعلق بحث کے دوران خواجہ آصف نے کہا کہ ماضی میں جنرل (ر) فیض حمید اور جنرل (ر) قمر جاوید باجوہ قومی اسمبلی میں آکر ارکان کو قائل کرنے کی کوشش کرتے تھے کہ دہشتگردوں کو واپس لانے سے فائدہ ہوگا۔ ان کا کہنا تھا کہ سیاسی معاملات پر مؤقف اختیار کرتے ہوئے ماضی کے فیصلوں اور اپنے کردار کو بھی سامنے رکھنا چاہیے۔

وزیر دفاع نے کہا کہ اگر سیاسی رہنماؤں کے قول و فعل میں تضاد رہے گا تو حالات بہتر نہیں ہوسکیں گے۔ انہوں نے اپنے جیل کے تجربے کا ذکر کرتے ہوئے بتایا کہ انہیں اٹک جیل میں چھ بائی چار فٹ کا سیل دیا گیا تھا اور دوسرا کمبل مانگنے پر نہیں ملا، تاہم شہباز شریف کو اس بات کا علم ہوا تو انہوں نے ان کے لیے کمبل بھجوایا۔

خواجہ آصف نے کہا کہ مسلم لیگ (ن) نے نواز شریف اور شہباز شریف کی رہائی کو سیاسی مسئلہ نہیں بنایا، جبکہ ان کے بقول پی ٹی آئی نے اپنے رہنما کی رہائی کو مرکزی معاملہ بنا رکھا تھا۔ انہوں نے کہا کہ حکومت کا اصل مسئلہ دہشتگردی ہے اور اس کے خلاف کارروائی کے لیے تمام سیاسی قوتوں کو متحد ہونا چاہیے۔

وزیر دفاع نے وزیراعلیٰ خیبرپختونخوا سہیل آفریدی پر تنقید کرتے ہوئے الزام لگایا کہ صوبائی حکومت دہشتگردی کے مقابلے کے بجائے سیاسی معاملات کو ترجیح دے رہی ہے۔ انہوں نے یہ دعویٰ بھی کیا کہ وزیراعلیٰ افغانستان میں موجود ایک شخص سے ہدایات لیتے تھے۔

خواجہ آصف کا کہنا تھا کہ ملک کو درپیش دہشتگردی کے خلاف جنگ مشترکہ طور پر لڑنا ہوگی۔ انہوں نے خیبرپختونخوا میں معدنیات اور صحت کے شعبوں میں ٹھیکوں اور حکومتی کارکردگی پر بھی سوالات اٹھائے۔ وزیر دفاع کے مطابق صوبے کے حالات ایسے ہوگئے تھے کہ حکومت کے پاس ایمرجنسی کے نفاذ کے سوا کوئی راستہ باقی نہیں رہا تھا۔