بلوچستان؛ سیکیورٹی فورسز کا واشک میں آپریشن، فتنۃ الہندوستان کے 5 دہشتگرد ہلاک، 4 زخمی

واشک: بلوچستان کے ضلع واشک کے علاقے پلانتک میں سیکیورٹی فورسز نے انٹیلی جنس بیسڈ آپریشن کے دوران فتنۃ الہندوستان سے تعلق رکھنے والے 5 دہشتگردوں کو ہلاک اور 4 کو زخمی کردیا۔

سیکیورٹی ذرائع کے مطابق یہ کارروائی آپریشن ردالفتنہ 3 کے تحت کی گئی، جس میں دہشتگردوں کے ٹھکانوں کو جدید ہتھیاروں سے نشانہ بنایا گیا۔

ذرائع کا کہنا ہے کہ کارروائی کے بعد ہلاک دہشتگردوں کے قبضے سے آر پی جی 7، پانچ گولے، میگزینز سمیت پانچ جدید ہتھیار، تین موبائل فونز اور دو موٹر سائیکلیں برآمد کی گئیں۔

سیکیورٹی ذرائع کے مطابق ہلاک دہشتگرد علاقے میں لوٹ مار، خوف و ہراس پھیلانے اور بنیادی ڈھانچے کو نقصان پہنچانے کی سرگرمیوں میں ملوث تھے۔

ذرائع نے بتایا کہ یہ کارروائی بلوچستان میں دہشتگردی کے نیٹ ورک کے خلاف جاری اقدامات کا حصہ ہے۔ سیکیورٹی فورسز نے صوبے سے دہشتگردی کے خاتمے کے عزم کا اعادہ کرتے ہوئے کہا ہے کہ امن و امان کے قیام کے لیے کارروائیاں جاری رہیں گی۔