’لوگ ترکیہ کی مثال بھول جائیں گے‘، ایمرجنسی یا گورنر راج کے حوالے سے سہیل آفریدی کا بیان سامنے آگیا

خیبرپختونخوا میں ایمرجنسی اور گورنر راج کے ممکنہ نفاذ سے متعلق سیاسی صورتحال کے درمیان وزیراعلیٰ سہیل آفریدی کا ردعمل سامنے آگیا۔

اپنے بیان میں وزیراعلیٰ سہیل آفریدی نے کہا کہ ہمارے مطالبات تسلیم کرنے کے علاوہ کوئی دوسرا آپشن نہیں، ایمرجنسی یا گورنر راج کا باضابطہ اعلان کیے بغیر ایسے اقدامات کرنا بغاوت کے زمرے میں آتا ہے۔ انہوں نے کہا کہ اگر ایسا فیصلہ کرنا ہے تو ہمت کرکے اس کا اعلان کیا جائے۔

سہیل آفریدی نے واضح کیا کہ وہ اپنے آئینی اور قانونی مطالبات سے کسی صورت پیچھے نہیں ہٹیں گے۔ ان کے مطابق آئین اور قانون کے دائرے میں رہتے ہوئے لانگ مارچ مطالبات کی منظوری تک جاری رہے گا۔

وزیراعلیٰ خیبرپختونخوا نے مزید کہا کہ ایمرجنسی یا گورنر راج کے اعلان کے بعد لوگ ترکیہ کی مثال دینا بھول جائیں گے۔ ان کا یہ بیان صوبے میں ممکنہ آئینی اقدامات اور وفاقی حکومت کے ساتھ جاری سیاسی کشیدگی کے تناظر میں سامنے آیا ہے۔