امن و امان اور جرائم کی روک تھام کیلئے ہر ممکن اقدامات کریں گے، محمد علی جمالی

گنداخہ (نورحسن جمالی) گنداخہ کی تاریخ میں پہلی بار ڈی ایس پی سرکل/ایس ڈی پی او گنداخہ محمد علی جمالی اور ایس ایچ او گنداخہ حاجی خان لاشاری کی جانب سے شہر کی تاجر برادری، شہریوں اور گنداخہ پریس کلب کے صحافیوں کے ساتھ کھلی کچہری کا انعقاد کیا گیا، جس میں بڑی تعداد میں تاجروں، شہریوں اور صحافیوں نے شرکت کی۔
کھلی کچہری کے دوران تاجر برادری، شہریوں اور صحافیوں نے علاقے میں امن و امان، ٹریفک، جرائم کی روک تھام اور دیگر مسائل کے حوالے سے ڈی ایس پی محمد علی جمالی کو آگاہ کیا۔ اس موقع پر شہریوں نے اپنے مسائل اور تجاویز بھی پیش کیں، جنہیں ڈی ایس پی نے غور سے سنا اور مسائل کے حل کے لیے ہر ممکن اقدامات کی یقین دہانی کرائی۔
ڈی ایس پی سرکل گنداخہ محمد علی جمالی نے کہا کہ شہریوں کی جان و مال کے تحفظ اور علاقے میں پائیدار امن کے لیے پولیس تمام دستیاب وسائل بروئے کار لا رہی ہے۔ شہریوں کو کسی صورت تنہا نہیں چھوڑیں گے، پولیس اور عوام کے درمیان رابطے کو مزید مضبوط بنایا جائے گا جبکہ تاجروں اور شہریوں کے مسائل کے حل کے لیے ترجیحی بنیادوں پر اقدامات کیے جائیں گے۔
انہوں نے کہا کہ جرائم کی روک تھام اور امن و امان کے قیام میں عوام کا تعاون انتہائی اہم ہے، شہری کسی بھی مشکوک سرگرمی یا جرم کی اطلاع فوری طور پر پولیس کو دیں تاکہ بروقت کارروائی عمل میں لائی جا سکے۔
اس موقع پر گنداخہ پریس کلب کے صحافیوں، تاجر برادری اور شہریوں نے ڈی ایس پی سرکل گنداخہ محمد علی جمالی اور ان کی ٹیم کی کارکردگی کو سراہتے ہوئے کہا کہ پولیس کی جانب سے کھلی کچہری کا انعقاد ایک مثبت اور قابلِ تحسین اقدام ہے، جس سے شہریوں کو اپنے مسائل براہِ راست پولیس حکام تک پہنچانے کا موقع ملا۔ شرکاء نے امید ظاہر کی کہ پولیس اور عوام کے درمیان یہ رابطہ مستقبل میں بھی جاری رہے گا۔