پولیو ورکرز اور سکیورٹی اہلکاروں کی قربانیاں رائیگاں نہیں جائیں گی،بخت کاکڑ

صوبائی وزیر صحت بلوچستان بخت محمد کاکڑ نے نوشکی میں پولیو ٹیم کی سکیورٹی پر مامور پولیس اہلکاروں پر ہونے والے بزدلانہ حملے کی شدید ترین الفاظ میں مذمت کرتے ہوئے حملے میں اہلکاروں کی شہادت پر گہرے رنج و غم کا اظہار کیا ہے۔اپنے ایک بیان میں وزیر صحت نے کہا کہ ہمارے شہدا قوم کا اصل فخر ہیں اور ان کی یہ لازوال قربانیاں ہرگز رائیگاں نہیں جائیں گی۔ امن دشمن عناصر ہمارے بچوں کے مستقبل کو معذور (اپاہج)بنانے کی مذموم سازشیں کر رہے ہیں۔ پولیو ٹیمیں ہمارے فرنٹ لائن ورکرز ہیں، اور اس طرح کے بزدلانہ حملے ہمارے عزم و جہد کو ہرگز متزلزل نہیں کر سکتے۔بخت محمد کاکڑ نے انکشاف کیا کہ بلوچستان میں گزشتہ 22 ماہ سے کوئی پولیو کا کیس سامنے نہیں آیا، جو کہ ہماری ایک بڑی کامیابی ہے، تاہم بیرونی ایجنڈے پر کام کرنے والے بزدل دہشتگرد بلوچستان کے مستقبل سے گھنانا کھلواڑ کر رہے ہیں۔ انہوں نے دوٹوک الفاظ میں کہا کہ پولیو ورکرز اور ان کی سکیورٹی پر مامور عملے کا تحفظ ہماری اولین ذمہ داری ہے، جس سے کسی بھی صورت پہلو تہی نہیں کی جائے گی۔صوبائی وزیر صحت نے عزم ظاہر کیا کہ دشمن چاہے جتنی بھی کوششیں کر لے، ہم اپنے بچوں کو محفوظ اور صحت مند مستقبل کی فراہمی ہر صورت یقینی بنائیں گے۔ ہم اپنی سرزمین اور آنے والے کل کے تحفظ کے لیے کسی بھی قربانی سے دریغ نہیں کریں گے۔ انہوں نے مزید کہا کہ بلوچستان میں بے امنی کے داعی عناصر بہت جلد اپنے انجامِ بد کو پہنچیں گے۔آخر میں صوبائی وزیر صحت بخت محمد کاکڑ نے شہدا کے لواحقین اور دکھ کی اس گھڑی میں غمزدہ خاندانوں کے ساتھ بھرپور اظہارِ یکجہتی اور تعزیت کیا