خضدار باغبانہ تھانے پر مسلح افراد کا حملہ، ایس ایچ او معمولی زخمی

خضدار: تحصیل باغبانہ کے پولیس تھانے پر مسلح افراد نے حملہ کردیا، جس کے نتیجے میں خضدار سٹی تھانے کے ایس ایچ او منیر عالم جتک معمولی زخمی ہوگئے۔

واقعے کی اطلاع ملتے ہی ڈی آئی جی خضدار وزیر خان ناصر، ایس ایس پی خضدار دوستین دشتی اور ایس ایچ او سٹی منیر عالم جتک بھاری پولیس نفری کے ہمراہ باغبانہ پہنچ گئے۔

پولیس حکام نے علاقے کو گھیرے میں لے کر صورتحال کا جائزہ لینا شروع کردیا، جبکہ واقعے کے بعد سکیورٹی مزید سخت کردی گئی ہے۔

دوسری جانب باغبانہ کے مقام پر این 25 قومی شاہراہ سے ٹریفک کو عارضی طور پر معطل کردیا گیا ہے۔ واقعے سے متعلق مزید تفصیلات سامنے آنے کا انتظار ہے۔