پشین میں پولیس، اے ٹی ایف اور سی ٹی ڈی کا مشترکہ آپریشن، 6 مشتبہ افراد ہلاک

پشین کے مختلف علاقوں میں پولیس، اے ٹی ایف اور سی ٹی ڈی نے مشترکہ کارروائی کی، جس کے دوران فائرنگ کے تبادلے میں 6 مشتبہ افراد ہلاک جبکہ 5 کو حراست میں لیے جانے کی اطلاع ہے۔

پولیس ذرائع کے مطابق کارروائی قلعہ عبداللہ اور کوئٹہ سے ملحقہ علاقوں سرانان، کلی اجرم، کلی سلطان، کلی مسافر اور گردونواح میں مشتبہ افراد کی موجودگی کی اطلاع پر کی گئی۔

ذرائع کا کہنا ہے کہ آپریشن کے دوران قانون نافذ کرنے والے اہلکاروں اور مشتبہ افراد کے درمیان فائرنگ کا تبادلہ ہوا، جس کے نتیجے میں 6 مشتبہ افراد ہلاک ہوئے جبکہ 5 افراد کو حراست میں لے لیا گیا۔

پولیس کے مطابق فائرنگ کے تبادلے میں اے ٹی ایف کا ایک اہلکار بھی زخمی ہوا، جسے طبی امداد کے لیے اسپتال منتقل کردیا گیا۔

ذرائع نے دعویٰ کیا ہے کہ ہلاک اور گرفتار کیے گئے بعض افراد کے کالعدم تنظیموں سے تعلق کا شبہ ہے اور وہ مبینہ طور پر پولیس تھانوں اور چوکیوں پر حملوں میں ملوث رہے ہیں۔

کارروائی کے بعد علاقے میں سیکیورٹی مزید سخت کردی گئی ہے جبکہ واقعے سے متعلق مزید تحقیقات جاری ہیں۔