بلوچستان میں سیکیورٹی فورسز کے کامیاب آپریشنز، کمانڈر سمیت 9 دہشتگرد ہلاک

مستونگ اور پشین میں سیکیورٹی فورسز اور قانون نافذ کرنے والے اداروں کی کارروائیوں کے دوران کمانڈر نقیب سمیت 9 مبینہ دہشتگرد ہلاک ہوگئے۔

سیکیورٹی ذرائع کے مطابق مستونگ میں فتنۃ الہندوستان کے خلاف کارروائی کی گئی، جس کے دوران کمانڈر نقیب سمیت 3 مبینہ دہشتگرد مارے گئے۔

ذرائع کا کہنا ہے کہ کارروائی کے دوران فورسز نے فتنۃ الہندوستان کی ایک گاڑی کو کواڈ کاپٹر کے ذریعے نشانہ بنایا، جس کے نتیجے میں گاڑی مکمل طور پر تباہ ہوگئی جبکہ اس میں موجود 3 مبینہ دہشتگرد ہلاک ہوگئے۔

دوسری جانب پشین کے مختلف علاقوں میں پولیس، اے ٹی ایف اور سی ٹی ڈی نے مشترکہ انٹیلی جنس بیسڈ آپریشن کیا۔ کارروائی سرانان، کلی اجرم، کلی سلطان، کلی مسافر اور گردونواح میں کی گئی۔

پولیس ذرائع کے مطابق آپریشن کالعدم تنظیم کے مبینہ دہشتگردوں کی موجودگی کی اطلاع پر کیا گیا۔ فائرنگ کے تبادلے میں 6 مبینہ دہشتگرد ہلاک جبکہ 5 مشتبہ افراد کو حراست میں لے لیا گیا۔

ترجمان کے مطابق کارروائی کے دوران سیکیورٹی اہلکار بھی زخمی ہوئے، جبکہ مبینہ دہشتگردوں کے قبضے سے اسلحہ اور بارود برآمد کیا گیا۔

پولیس کے مطابق ہلاک افراد کے لاشیں کوئٹہ منتقل کردی گئی ہیں تاہم تاحال ان کی شناخت نہیں ہوسکی۔ حکام کا کہنا ہے کہ ہلاک مبینہ دہشتگرد فورسز اور شہریوں پر حملوں میں ملوث رہے ہیں۔

سیکیورٹی فورسز اور قانون نافذ کرنے والے اداروں نے بلوچستان میں دہشتگردی کے خاتمے کے لیے کارروائیاں جاری رکھنے کے عزم کا اظہار کیا ہے۔