گوادر میں خوفناک حادثہ، مسافر کوچ اور پک اپ میں تصادم، 2 جاں بحق

گوادر: مکران کوسٹل ہائی وے پر ماکولا کے قریب مسافر کوچ اور پک اپ گاڑی میں خوفناک تصادم کے نتیجے میں 2 افراد جاں بحق جبکہ متعدد افراد زخمی ہوگئے۔

پولیس کے مطابق حادثے کی اطلاع ملتے ہی امدادی ٹیمیں موقع پر پہنچ گئیں اور جاں بحق افراد و زخمیوں کو اسپتال منتقل کردیا گیا۔

پولیس نے بتایا کہ حادثے میں تربت کے رہائشی صغیر احمد ولد غفور اور بنگلہ بازار پسنی کے رہائشی امجد ولد استاد واحد میانداد جاں بحق ہوئے۔

ایس پی کوسٹل ہائی وے پولیس حفیظ امیر کے مطابق حادثے کے بعد کوچ ڈرائیور موقع سے فرار ہوگیا جبکہ کلینر کو حراست میں لے لیا گیا ہے۔

پولیس کے مطابق حادثے کی مزید تحقیقات جاری ہیں۔