سول اسپتال کوئٹہ میں جڑواں بچوں میں سے ایک نومولود کے مبینہ لاپتہ ہونے کا معاملہ، تحقیقات شروع

سول اسپتال کوئٹہ میں زچگی کے دوران جڑواں بچوں کی پیدائش کے بعد ایک نومولود کے مبینہ طور پر لاپتہ ہونے کا معاملہ سامنے آیا ہے۔

بچوں کے والد شہزاد کے مطابق الٹراساؤنڈ اور اسپتال کی رپورٹ میں جڑواں بچوں کی پیدائش کا ذکر موجود ہے، تاہم اسپتال کی جانب سے انہیں صرف ایک نومولود بچہ دیا گیا، جبکہ دوسرے بچے کے بارے میں انہیں واضح معلومات فراہم نہیں کی گئیں۔

والد نے مطالبہ کیا ہے کہ دوسرے نومولود کے حوالے سے حقائق سامنے لائے جائیں اور معاملے کی مکمل تحقیقات کرکے ذمہ داروں کا تعین کیا جائے۔

دوسری جانب ایم ایس سول اسپتال کوئٹہ نے واقعے کا نوٹس لیتے ہوئے تحقیقات کے لیے کمیٹی تشکیل دے دی ہے۔

اسپتال انتظامیہ کے مطابق معاملے کی تحقیقات جاری ہیں اور تحقیقات مکمل ہونے کے بعد ہی دوسرے نومولود کے حوالے سے صورتحال واضح ہوسکے گی۔