منشیات کے خلاف جنگ میں بلوچستان حکومت کی زیرو ٹالرنس پالیسی ہے، وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی نے کہا ہے کہ صوبائی حکومت منشیات کے خلاف زیرو ٹالرنس پالیسی پر عمل پیرا ہے اور نوجوان نسل کو منشیات کے ناسور سے محفوظ بنانا حکومت کی اولین ترجیح ہے۔

سماجی رابطے کی ویب سائٹ ایکس پر اپنے بیان میں وزیراعلیٰ سرفراز بگٹی نے کہا کہ بلوچستان میں گزشتہ دو برس کے دوران 133 ارب روپے سے زائد مالیت کی منشیات ضبط کرکے تلف کی گئی ہیں۔

انہوں نے بتایا کہ منشیات کے خلاف مختلف کارروائیوں کے دوران 1,638 کلوگرام آئس (کرسٹل) اور 620 کلوگرام چرس قبضے میں لے کر تلف کی گئی، جبکہ 27 ہزار سے زائد غیر ملکی شراب اور بیئر کی بوتلیں و کین بھی ضبط کرکے تلف کیے گئے۔

وزیراعلیٰ بلوچستان کا کہنا تھا کہ منشیات کے خلاف جاری کارروائیاں حکومت کے اس پختہ عزم کا اظہار ہیں کہ نوجوان نسل کو اس لعنت سے محفوظ رکھا جائے۔ انہوں نے کہا کہ منشیات کے خاتمے کے لیے قانون نافذ کرنے والے اداروں کی کارروائیوں کو مزید مؤثر بنایا جائے گا۔

میر سرفراز بگٹی نے کہا کہ منشیات سے پاک بلوچستان حکومت کی اولین ترجیح ہے اور نوجوانوں کے مستقبل کو محفوظ بنانے کے لیے ہر ممکن اقدام جاری رکھا جائے گا۔