پاکستان نے نارووال میں مندر توڑنے سے متعلق بھارتی وزارت خارجہ کے دعوے مسترد کردیے

اسلام آباد: پاکستان نے نارووال کے علاقے اڈہ سراج میں ہندو مندر مسمار کیے جانے سے متعلق بھارتی وزارت خارجہ کے دعوے کو مسترد کرتے ہوئے اسے حقائق کے منافی اور سیاسی مقاصد پر مبنی قرار دے دیا۔

ترجمان دفتر خارجہ سجاد حیدر خان نے کہا کہ اڈہ سراج میں مندر کی عمارت 21 جولائی کو ہونے والی شدید بارشوں سے متاثر ہوئی تھی۔ ان کے مطابق مقامی انتظامیہ نے نقصان کا جائزہ لینے کے بعد مندر کی عمارت کی بحالی کے لیے عملی اقدامات شروع کردیئے ہیں۔

ترجمان نے بھارتی وزارت خارجہ کے بیان کو مسترد کرتے ہوئے کہا کہ بھارت حقائق کو توڑ مروڑ کر پیش کرنے اور سیاسی مقاصد کے لیے ایسے معاملات کو استعمال کرنے سے گریز کرے۔ انہوں نے کہا کہ اس طرح کے دعوے بھارت میں اقلیتوں سے متعلق صورتحال سے توجہ نہیں ہٹا سکتے۔

سجاد حیدر خان کا کہنا تھا کہ بھارت میں اقلیتوں اور ان کی عبادت گاہوں کے حوالے سے ریکارڈ سب کے سامنے ہے۔ دنیا اس بات سے بھی آگاہ ہے کہ ہندوتوا نظریے کو اقلیتوں کے خلاف کس طرح استعمال کیا جا رہا ہے۔

ترجمان دفتر خارجہ نے کہا کہ بھارتی قیادت کو مسلمانوں، سکھوں اور مسیحی برادری کے خلاف مبینہ مظالم کے لیے جوابدہ ہونا چاہیے۔