ڈسٹرکٹ خزانہ آفیسر جھل مگسی سے اساتذہ، معززین اور صحافیوں کی ملاقات

گنداواہ(رپورٹ شیر احمد ساسولی نمائندہ صحافت)جھل مگسی سے ملاقات
ڈسٹرکٹ خزانہ آفیسر جھل مگسی لیاقت علی ایری سے گورنمنٹ ٹیچرز ایسوسی ایشن جھل مگسی کے ضلعی صدر باز محمد گھوٹیہ، معزز شخصیت حبیب اللہ انصاری، وڈیرہ علی ڈنہ کلواڑ، استاد عبدالرشید لاشاری اور صحافی برادری نے خزانہ آفس گنداواہ میں ملاقات کی۔
ملاقات کے دوران ملازمین، پنشنرز اور عوام کو درپیش مختلف مسائل سمیت دیگر امور پر تفصیلی تبادلہ خیال کیا گیا۔ اس موقع پر ڈسٹرکٹ خزانہ آفیسر جھل مگسی لیاقت علی ایری نے کہا کہ ملازمین، پنشنرز اور عوام کے مسائل کے حل کے لیے بھرپور اقدامات کیے جا رہے ہیں۔ انہوں نے کہا کہ محکمہ خزانہ سے متعلق عوامی و ملازم پیشہ افراد کے مسائل کو ترجیحی بنیادوں پر حل کرنے کے لیے ہر ممکن تعاون فراہم کیا جائے گا۔
لیاقت علی ایری نے مزید کہا کہ سرکاری ملازمین اور پنشنرز کو بروقت سہولیات کی فراہمی اور ان کے جائز مسائل کا ازالہ محکمہ خزانہ کی اولین ترجیحات میں شامل ہے۔