عمران خان کی اسپتال منتقلی سے متعلق توہین عدالت کی درخواست کی فوری سماعت کےلیے ایک اور درخواست دائر

اسلام آباد (ویب ڈیسک) بانی پی ٹی آئی عمران خان کی اسپتال منتقلی سے متعلق توہین عدالت کی درخواست کی فوری سماعت کے لیے سپریم کورٹ میں ایک اور درخواست دائر کردی گئی۔

عمران خان کی ہمشیرہ عظمیٰ خان کی جانب سے دائر درخواست میں مؤقف اختیار کیا گیا ہے کہ رجسٹرار آفس کی جانب سے فوری سماعت کی پہلی درخواست مسترد کیے جانے کے بعد دوبارہ عدالت سے رجوع کیا گیا ہے۔

درخواست کے مطابق عمران خان کی جیل میں صحت سے متعلق صورتحال تشویشناک ہے اور سپریم کورٹ کے 18 اگست کے حکم کے مطابق انہیں طبی معائنے اور علاج کے لیے مطلوبہ اسپتال منتقل نہیں کیا گیا۔ درخواست میں کہا گیا ہے کہ معاملہ بانی پی ٹی آئی کی صحت اور زندگی سے متعلق ہونے کے باعث انتہائی اہمیت کا حامل ہے۔

درخواست میں عدالت سے استدعا کی گئی ہے کہ عمران خان کو طبی معائنے اور علاج کے لیے شفا انٹرنیشنل اسپتال منتقل کرنے کے احکامات جاری کیے جائیں اور 18 اگست کے عدالتی حکم پر فوری اور مکمل عمل درآمد یقینی بنایا جائے۔

درخواست میں مزید مؤقف اختیار کیا گیا ہے کہ عدالتی حکم پر عمل درآمد نہ کرنا ارادی اور قانون کی خلاف ورزی کے زمرے میں آتا ہے، جبکہ کیس فکسیشن پالیسی توہین عدالت کی فوری سماعت میں رکاوٹ نہیں بن سکتی۔

درخواست گزار نے عدالت سے استدعا کی ہے کہ توہین عدالت کی درخواست کو رواں یا آئندہ ہفتے سماعت کے لیے مقرر کیا جائے اور 16 ستمبر کو کیس فکس کرنے کے فیصلے پر بھی نظرثانی کی جائے۔