خیبرپختونخوا اور بلوچستان میں 11 دہشتگرد ہلاک، محسن نقوی کا سیکیورٹی فورسز کو خراج تحسین

وزیر داخلہ نے فتنۃ الخوارج اور فتنۃ الہندوستان کے خلاف کامیاب کارروائیوں پر فورسز کی پیشہ ورانہ صلاحیتوں کو سراہا

اسلام آباد: وفاقی وزیر داخلہ محسن نقوی نے خیبرپختونخوا اور بلوچستان میں فتنۃ الخوارج اور فتنۃ الہندوستان کے دہشتگردوں کے خلاف کامیاب انٹیلی جنس بیسڈ آپریشنز پر سیکیورٹی فورسز کو خراج تحسین پیش کیا ہے۔

محسن نقوی نے کارروائیوں کے دوران 11 دہشتگردوں کو ہلاک کرنے پر سیکیورٹی فورسز کی پیشہ ورانہ صلاحیتوں اور بروقت کارروائی کو سراہا۔

وزیر داخلہ نے کہا کہ سیکیورٹی فورسز کے بہادر جوانوں نے بروقت کارروائیاں کرتے ہوئے دہشتگردوں کے مذموم عزائم کو ناکام بنایا۔ ان کا کہنا تھا کہ سیکیورٹی فورسز کے بہادر سپوت قوم کا سرمایۂ افتخار ہیں۔

محسن نقوی نے کہا کہ دہشتگردی کے خلاف جنگ میں پوری قوم اپنی سیکیورٹی فورسز کے شانہ بشانہ کھڑی ہے اور ملک کے امن و استحکام کے لیے فورسز کی قربانیوں کو قدر کی نگاہ سے دیکھتی ہے۔

انہوں نے کہا کہ دہشتگردی کے مکمل خاتمے کے لیے سیکیورٹی فورسز کی کارروائیاں قابل تحسین ہیں اور قوم اپنے بہادر جوانوں کے ساتھ متحد ہے۔