امریکا سے تجارتی جنگ، کینیڈا کا بھی جوابی ٹیرف کا اعلان

واشنگٹن/اوٹاوا: امریکا اور کینیڈا کے درمیان تجارتی تنازع مزید شدت اختیار کرگیا، کینیڈا نے امریکی ٹیرف کے جواب میں جوابی اقدامات کا اعلان کردیا ہے۔

کینیڈین وزیراعظم مارک کارنی نے کہا ہے کہ 8 ستمبر سے امریکی اسٹیل، الیکٹرانکس اور دیگر مصنوعات پر نئے تجارتی ٹیرف نافذ کیے جائیں گے۔ انہوں نے کہا کہ کینیڈا اپنے ورکرز، کسانوں، خاندانوں اور کاروباری اداروں کے مفادات کا تحفظ کرے گا۔

مارک کارنی کا کہنا تھا کہ تجارت کے معاملے پر امریکا کے ساتھ صورتحال انتہائی کشیدہ ہے اور کینیڈا اپنے معاشی مفادات کے دفاع سے پیچھے نہیں ہٹے گا۔

کینیڈین وزیراعظم کا یہ اعلان امریکا اور کینیڈا کے درمیان تجارتی مذاکرات میں ناکامی کے بعد سامنے آیا ہے۔ اس سے قبل امریکی صدر ڈونلڈ ٹرمپ نے کینیڈا سے درآمد ہونے والی مصنوعات پر 50 فیصد ٹیرف عائد کرنے کا اعلان کیا تھا۔

تجارتی ماہرین کے مطابق نئے ٹیرف اقدامات سے دونوں ممالک کے درمیان معاشی تعلقات متاثر ہونے اور دوطرفہ تجارت پر دباؤ بڑھنے کا خدشہ ہے۔